Op Zaoterdag dâtteg Mei gungn de leedn van de Toer Club Darp al vrôg op pad, um deel te nemm an een toertocht in de Eifel. Harm uut’t Darp was ok uutedaagd, um met te gaon pedaleern. Naor de Eifel, euh….Wijfel…..ach, doe eens gek. En veur dâk tur ârg in hâdde, hâk mien ineschreevm biej de koersdireksie van TC Darp en umstreekn. Honderdtwinteg kilometers an asfalt was tur uutepijld deur de SRV van Euskirchen, euh….ik bedoele natuurlek De RSV Euskirchen. Um 5.30 uur was ut vertrek an de Mârkstraote, en de zeuvmtien deelnemers stündn te trappelln van ongeduld. De trapmechines werdn vakundeg in de Diekstra Bedriefsauto’s bestelwaagn elaajn deur de chef routeplenner Jan uut Duutsland. Marja, de reis gung dan ok naor die Heimat. Een tweede Diekstrabusse kon de speulers vervoern, mar dat was nog niet genôg! ChrisJapie Dubbel Lüch, en Hansie Sloothuus stelln hun bolides beschikbaar, um de res van ut fietscircus te vervoern. Wat muj toch zonder zûkke figuurn? Bedank Vente !

Ut circus TC Darp gung opweg, en veur Venlo werd tradisiegetrouw een kôtte koffiestop emâk. Leeuwin Wilma kreeg ut veur menaere, um drêk de koffiemechine te sabboteern. Ie konn drukkn waj wölln op de knöppies, mar de konkelpot gaf gin sjoegem meer. Gelukkeg veur de luu uut Darp en umstreekn, waarn d’r nog wêh een paar andere koffiemechines. Hafoj!

De leste etappe naor Euskirchen werd vlot volbracht deur ut peleton, en kon een ieder zich gaon opmaekn veur de rit. Nee, niks gin poespas of mascara! Gewoon de fraaie TC Darp kleding antrekkn. En dan staoj gewoon in een woonwiek, oe eigens umme te kleedn. Hansie had tur Tebak van. Die verstoppm zichzelf in de struukn, as een echte struuknduuker! De warmriejfietse was thuus ebleevm, mar de vollnde keer giet ut dink met. Naodat alle leedn zich haddn emeld biej de recepsie van de RSV, werdn de luu uut Darp weg escheutn deur de burgemeister van Euskirchen. Dat was nog es een statschot, ofnietan?

Wuule waarn ut darpien nog niet uut, of de eerste klim van de dag doemm al op. Lâkker pitteg en net lang genôg um buutn aosem te geraakn. Blâksum, as dat zo deurgiet, de kommde 120 km, dan hêk de bok an ’t drietn, dach uule repôtter Harm. Nao de tweede bult, keek ik es achterumme, en was de tweede groep in gin veldn of weegn te bekenn. Nou, dan mar trappm veur waj weerd bint, en mar zien waorof ut schip strandn zal. De fanetieke fietsers deudn d’r gewoon een scheppien boovmop, en zettn een tandtien biej. Hafoj, wat een gemâttel, toch. Dit giet niet goed komm, Harmpie! Nao een kleine veerteg kilometer mös Harm uut’t Darp de kopgroep laotn gaon, mar sjankn had gin zin. Twee pofferds op de neuze, met iene aksie!

Ut deud zeer, um te mârkn daj mut passn, en um nog 80 km te volbrengn. Marja, ut was Harm zien eign schuld. Te weineg km emâk in ut veurseizoen, en dan kriej as vanzelf de rekening presenteerd. Ondanks dâk te kenn had egeevm, um alleent vandan te fietsn, bleef René Verstraler biej mien achtur, um saamm de tocht uut te pedaleern. Man, doar was ik mar wat wies met! René namp Harm op sleptouw. Biej de tweede fourageplekke, stund de Foef van RSV Euskirchen klaor met drinkn en wat ander grei. De koplopers uut Darp stundn René en uule repôtter al op te wachn met iene grote glimlach. ” ik maake uule allemaole kepot!” Riep ik naor die luu. ” is ut niet met de fietse, dan mar met ut schrievm van een mooi proza!” BAM !

Iederiene lag natuurlek krom van ’t lachn, en zo heurt ut ok. GaitJan Bokito snappm de hint, en meesmuilnd zee Bokito; ach Harm, komp mar achtur mien an jaagn, ik hol oe wêh uut de wind.

Jaja, zo lüs ik tur nog wêh een paar…..

D’r volgn nog een antal stevege klimmegies, waorof Harm niet wüs, hoe hie boovm mös komm, mar vraog niet hoe, ik hebbe ut ered. Ut leste deel van de fraaie toch leup geleidelek of, en was de preuze wind ons gunstig ezind. Met 40 op de teller, effm lunchn met de handties los. Dan weet ie, dattut lâkker löp. Bienao zaleg…..

Nao 120 km op de teller kwamp Euskirchen weer in beeld. Ondanks zwaor ofzien, hêk dankzij de Verstraler toch wêh lâkker efietst. Oja, de man die an’t vertrek verscheen met gele Rossiklompm (!) die kreeg nog effm iets te heurn van de veurzitter: De klompmboer had ChrisJaap Dubbel Luch Binndeur, en de veurzitter buutnumme passeert in iene bocht! Dat was uut den boze, zee Pieter.

Ut bleek een ongeschreevm wet te wean, um mekaere niet in te haeln in een kniebocht of Tarzanboch. Mar ik zage niemand met een gele vlagge zwaain, dus gas op de lolly.

Biej deze mien excuses, vente.

Toen René en Harm zich ofmelln biej de koersdireksie, lag iene van de breurs Schakelspecialist op ut gres met nare zeerte in ’t lief. Koos wüs niet meer hoe hie ut had, en een dokter werd erbiej ehaald. Koos de Schakelspecialist mös mee naor ut huus veur ziekn, en doar werd hie grondeg inspecteerd. Pas in de loop van de aomp kon de beide tweetalln ( de beide Hansies en de breurs Schakelpedaal ) weer terugkeern naor Darp.

Al met al een tocht met veul verhaaln en spanning, mar wel ientie die meer as de meujte weerd was. Jan & Helko bedank veur de organisasie! René nogmaols dank, en de beide Hansies bint bedank veur ut vervoer van de Schakelspecialistn.

 

De groenten van Harm uut’t Darp.